Drach'n stiig'n loot'n

Weis Du noch wi dat in Sommer weer, wenn de Buern den Rogg'n mait haan un de Hock'n stünn? Denn weer't Tiit den Drach'n ruuttohol'n. Ruuthol'n is gout, mais haa he dat leste Johr nich oberleevt. Ek weet blous noch, dat ek jedet Johr nei'n Drach'n bau'n moss. Wat ek dorto hebb'n moss, weer ganz einfach: Packpepiir, Band, ole Zaitung'n, Meel un Woter un dat wichtigste weern natürlich twei Liis'n von Discher. Un wail dat Packpepiir bruun weer, weern aal Drach'n bruun. Wenn ein dat bunter hebb'n woll, denn moss ouk mool de Tuschkas'n her un denn kreich de Drach'n eben'n bunt Gesich. Fo de Kinner de blous noch ern Nintendo kennt, hier ne Bauanlaitung for'n Drach'n. Ersmook nöim man de baid'n Liis'n un möik'n Krüüz, meit dat natürlich no, dormit de linke Siit nich breider weer wie de rechte un möik dat mit'n littsch'n Noog'l fass. Denn moss man mit'n Messer ne littsche Nuut an de Ends von dat Krüüz mooken, dormit man rundrum ein Band tein konn. Wenn man sou wiit weer, weer dat Gerüss fertich. Nu leich man dat op Packpepier, löit'n Rand von 2 bit 3 cm stoon un sneer den Ress mit de Scheer af. Ut Woter un Meel möik man den Meelkliister, smeer den op den Rand un klapp den Rand ober dat Band um. Jetz moss man dormit de Drook'n ouk einigermoten ruich in Wind leich, ein Steert mook'n. Man nöim ungefähr 2 m Band un moik dor Zaitungsstücke an fass. An de Lengsliis'n hebb ek denn noch'n littschet Band fassmookt un dör dat Packpepiir toog'n. Wenn de Kliister dröich weer, konnt lousgoon. Foken weer de Drach'n sou swoar, dat man denn bi nomol'n Wind knapp hochkriig'n dö. Un ouk dat Band is nich to vegliik'n mit de Nylons de wi vondoch kennt. Dor konn dat ouk pessern, dat dat Band afriit'n dö un denn güng de Drach'n koppaister. Un denn konn man frou ween, wenn de Drach'n sek nich in de elektisch'n Laitung'n verfüng oden in'n Baum güng. Manchmol haa man dat Pech, dat Reeg'n oder'n Gewitter köim. Dat weer mais ober kein Probleim, denn dor weer jo de Hock'n, in de man rinnkriip'n konn. Dat Drach'nband moch de Foichtichkait oberhaupt nich, un maistens reit dat Band. Un nich selten leich dat natte Band ober ne elektrische Laitung un ek am Enn von dat Band. Wenn ek vondooch dorober nodenk, wunner ek mi noch, dat nix pesseert is. Mit Sicherhait hedd dat domols ouk mehr as blous ein Schutzeng'l geeb'n.

Heinz Tödtmann