Krüzfohrt oder Seniorenheim

von Heidi Uhlenkamp

(komme in den Raum gehumpelt, fasse mir ins Kreuz und stöhne:)

 

Kerl,Kerl,Kerl, is datt'n Krüz mit dat Krüz. Watt jo allens nich beeter. Häbb all ober nodach, in son Senioren-Wohnpark to gohn. Ober ek glöiv, datt is duch nix för mi.

 

Dor Häbbt se jo gonnich nooch Lüer, de sek um di kümmern künnt. All'ns geiht jümmers in Galopp. Tiet för'n lütten Klönschnack is nich - oder de Pleegers verstoot keeen dütsch, un plattdütsch all lang nich.

 

Häss mol Koppkeel un bruuks ne Pille, denn gevt se di womöchlich watt gegen "Darmträgheit". Wees jo aal'ns nich.

 

Also häbb ek mi dacht, dat möt doch noch wat anneres geben. Irgendwatt, wo du di nich vörkümmst as op een Aafstellgleis.

 

Häbb mi an mien schlauen Apperot sett un bi Goggle nokeeken, un wat häbb ek funnen?

 

Eene Langzeitpasssage för Rentner op een Krüzfohrtschipp.

 

Denn häbb ek de Priese vergleeken, un du schass dat nich glöb'n: Een Dach in een Seniorenwohnpark köst ungefähr 65,-- € mehr als een Dach op een Krüzfohrtschipp.

 

Blauß, so ne Krüzfohrt häbb ek noch ni mokz, mol op de Wes bitt no de Ueser Bröch - ach jo, un eenmol no Helgoland.

 

Ober Ewald un Ingrid sünd jo all oberall op de Welt rumschippert. De beiden häbbt mi vertellt, dat sek dat op son Schipp ganz wunnerbor leben lätt. Dat mös jo nich glieks de "AMADEA" wesen, de weer mi woll denn doch to düer.

 

Ober op de "AIDA" könn dat mit den Pries woll passen. Nu häbb ek mi oberlecht, war ek för mien Geld op een Krüzfohrtschipp all'ns kriegen kann:

 

1. 10,-- € den Dach an Drinkgeld möt wesen. De Stewards schüllt mi doch all besünners nett behanneln.

 

2. Ek häbb 10 freie Mohltieten an Dach, wenn ek in een von de Bordrestaurants humpeln do, oder se bringt mi datt Eeten sogor op miene Kabine. Fröstücken könn ek ok in mien Bett. - Versök datt mol in Seniorenheim.

 

3. Op de AIDA giv datt mehrere Swimmingpools, Fitnessrooms un jeden Obend Shows för miene Belustigung. - Nich dütt blöde Gedächtnistraining un Gymnastik op'n Stohl aas in Seniorenheim, wo keen een Lust to hätt.

 

4. Tehnpasta, Seepen un Hoorshampoo, Bettwäsche un Handdöker giv dat op'n Schipp umsüss. - In Seniorenheim deilt se di dat genau to, oder diene Angehörigen möt die Krom moken.

 

5. Op een Schipp büs du Kunde un nich Patient. Un för 5 € Drinkgeld oberher den Dach leest di de Stewards jeden Wunsch vonne Oogen af.

 

6. All een oder twee Weeken goot Lüer von Bord un koomt nege Lüer.- Dat is jo in Seniorenheim ok nich veel anners.

 

7. Is mol de Fernseher in diene Kabine twei, de Matratze to week oder to hart? Du bruks dat blauß to seign, un in nullkommanix is all'ns klor mokt. - Umsüss, versteit sek! - In Seniorenheim kanns op sowatt lang töb'n.

 

8. Wenn ek in Seniorenheim mol fallen do un mi eene Rippen breek, denn bring se mi - wenn ek Glück häbb - no eene Stünn in een Krankenhus, un dor möt ek - wenn ek Pech häbb - jeden Dach önnich watt tobetohlen. - Op de AIDA gevt se mi ne Suite, un de Bordarzt nimmt gonnix vör siene Behandlung.

 

Nu noch dat Allerbeste:

Mit de AIDA kann ek no Amerika, Afrika, Australien - wohenn ek will.´Ek häbb jeden Dach von de 65 € noch 50 € ober un möt nichmol mehr för miene Beerdigung sporn, denn in mien Testament steit: "Wenn mien Stünn koom'n is, smiet mi man eenfach ober Bord." Dat is nämlich ok umsüss.

 

Hört sek dat nich all'ns wunnerbor an?

 

Heinz Tödtmann