An Obend vo den 6. Dezember stellt de Kinner ere Schou oder Steeb'l vo de Dör oder'n Teller up de Finsterbank, dormit inne Nach de Nikolaus dor wat rindoun kann. Un an annern Mog'n is de erste Wech dorhen. Mais hett de Nikolaus war rindoon: Appeln, Nööt, ouk wat Söits. Wenn dat denn an 6. Dezember langsoom dunk'l watt, gait dat denn lous mit'n Nikolausloup'n. Denn teit de Kinner lous von Huus to Huus. Maistens hebbt se sik dat Gesich swaat mookt oder'n Mask'n upsett, 'n Hout oder'n Mützen upsett un 'n Mann'l oder Jack antoog'n de mais feel to lang is. 'n grouten Knüpp'l in de Hand un 'n Büüt'l ober de Schullern teit se mit Schandool dör de Stroot'n. Bi jedet Huus stellt se sik vo de Dör up un singt:

"Ek bin sou'n liitsch'n Köinich

geev mi nich toweinich

loot mi nich sou lange stoon

denn ek meit noch wiitergoon

Hali hali halo

sou gait no Brem'n tou!"

oder ouk:

"Nikolaus de groute Mann

kloppt an aale Dör'n an

Littsche Kinner giff he watt

groute stickt he in den Sack

Hali hali hali

sou gait no Brem'n tou!"

Un wenn se den Spruch upsech han, geivt wat in den Büüt'l, Appels, Nööt oder watt Söits. Wenn allerdings de Dörn nich op'ngüng, keim noch'n Spruch achterher:

"Witt'n Tweern, swatt'n Tweern

giizge Lüer geevt nich gern!"