Ober mi is nich veel to vertell'n

 

 

blous souveel, dat du weis, mit wenn du dat to doun hess. Wenn du mi froochs, wo miin Wuddeln sind, kann ek gans einfach ne Antwoat geeb'n: dor, wo ek geboern bin, wo ek upwuss'n bin un wo ek toun erst'n Stimm'n hört hebb. Ouk wenn man nich meer weit, wat sech wunn'n is ober man kann sik vostell'n, wi sik dat anhört hett.

 

"Dat Kind is jetz doa. Is'n Jung." 

 

Dissen Klang vonne Stimm vergitt man sin gans Leeb'n nich. Un wenn du op ein Rais in Ofriko oder Ameriko dissen Klang genausou von irgendein'n Minsch'n hör'n dais, denn weis du, de kummt dorher wo du herkumms.

 

Ek bin 1944 geboer'n up'n Exoff (Erichshof is meint un wo dat is, kanns du unn'n up dei Koat'n sein). Dat heit nämlich up'n Exoff un nich in Exoff! As ek up de Welt keim, wer min Vadder no in'n Kriich un aal Minsch'n de um mi weer snack'n platt. Miin erste Muddersprook is Platt ween. Houchdütsch hebb ek ers inne Schoul leert. Do har ek ober gliiks 'n Probleem. Ek wuss woll wat mir un dir weer ober nich wat mir un mich. Dorbi is da up Platt sou einfach: mi un di! Ober irgendwann hebb ek dat doch noch in'n Griff kreeg'n. Wenn du mi vondooch froog'n dais, wo ek wohn'n dou, jimmer no up'n Exoff, 250 Meter von min Geburtshuus wech.

 

Ek bin to keiner Tiit  woanners ween un hebb min ganzet Leeb'n - wenn ek dat woll - platt snackt. Wat nich sou schöin is, dat de Lüe, dei den hiisig'n Dialekt no snack'n künnt, jümmer weiniger weert. Un denn hedd man dat Geföil, dat dat blous noch'n poa Joar duert, un denn kennt oberhaupt keiner mehr dat hiisige  Platt. Wenn Du weeten wull, wat nun genau  miin Anleig'n is, muss du hier nokiik'n.

 

Bet vo kort'n hebb ek ouk noch Musik mookt. To Anfang bi de "Kolibris" un löter bi de "Coolbreeze". Dor hedd min leiber Fründ Werner mi ober no ober 60 Joar'n de Fründschaff kündicht un mi einfach rutsmeet'n. Schöin'n Dank, Werner! Ek haar mool ober eine Person de Woorhait sech, dorbi stait doch in de Biibel, dat man jümmer de Woorhait seig'n schall!. Dor kanns mool sein, wat Fründschaften manchmool wert sind! Oober de Woorhait künnt einige nich verdreeg'n.  Ek kann di seig'n, dat hedd in min Bekannt'nkrais oober richtich Luff geeb'n. Un watt sech de Plattdüütsche? Biss du ers mool utsortiert, leevt sek dat ganz unjeniert!  Op jed'n Fall bruuk ek mi nich meer to agern. Un dat Schöne is, annere Öllern hebbt ouk schöine Jungs un Deerns un ek hebb nu ouk wo meer Tiit fo annere Sook'n, de mi Spooß mookt. Wenn man henfaalt, opstoon, Kroune richt'n un wiitergoon!

 

Un dat mi ouk annere Sook'n intressiert, kanns du sein, wenn du mine Galerie di ankiik'n dais. 

 

Inhalte von Google Maps werden aufgrund deiner aktuellen Cookie-Einstellungen nicht angezeigt. Klicke auf die Cookie-Richtlinie (Funktionell), um den Cookie-Richtlinien von Google Maps zuzustimmen und den Inhalt anzusehen. Mehr dazu erfährst du in der Google Maps Datenschutzerklärung.

Heinz Tödtmann