Pings'n

De Wintertiit weer de Tiit fo de Spinnkoppels. Hier hebbt de jung'n Lüer sik mais toun erst'n mool beet'n besnuppert. Un wenn denn dat Förjoar keim, hebbt se dorvon dröimt, dat se denn ouk'n Maiboum kreeg'n. 'n Maiboum weer ne afsoochte Baark'n. Inne Nach vo Pings'n haarn de Jungs nix beeters to doon, aas n Maiboum vor dat Koomerfinster von ein Deern tou plant'n un froue Pings'n to wünsch'n. Ober de Maiböim moss'n klaut weern, sons broch'n se kein Glück. De Jungs haarn veel to doon, Maiboum upstell'n, Maiboum klau'n un twischendör - wi konn dat anners ween - den Brammin suup'n. Dat konn ouk mool vokoom'n, wenn ein Deern sik in er'n Kopp'n vobibenoom'n harr, dat se an Stea von frisch'n Maiboum 'ne verdröichte Fuern vo er Koomerfinster henstellt kreich. Manchmool hedd sek ouk Oma frait, wenn vo er Sloopkoomer Maiboum stünn. Do haan de Jungs woll beeter hinkiik'n schollt. In Kaakwai geiv dat ouk noch wat besonners: wenn mehrere Deerns up ein Hoff weern, kreich de Deern den Maiboum, de am läng'n up'n Hoff ween weer. Un aals wat nich unnern Dack weer, köim unnern Maiboum: Melkkann'n, Pött, Schuufkoan, Botterfätt.

 

Ein Dach vo Pings'n hett man oberall junge Baak'ntwiich anne Neddendöörn anbroch. Inner Reckumer Geegend moss'n de Deerns dorvo Geld geeb'n un dorvon wurd veertain Dooch looter dat Maiboumbeer fiert un netürlich kräftich danzt.  In de Geegend von Kaakwai dreib'n in de Nach vo Pings'n de Jungs dat gans dull, denn denn hebbt se aals wat se up'n Hoff inne Finger kreig'n up't Dack sleept. 

 

An tweit'n Pingsdach oder an Sonndach no Pings'n köim'n de Spinnköppel tosoom'n un möik'n 'n Danzvergnöig'n up ein Deiln von ein'n de to jem hör'n de.

 

"Wenn Pings'n is, wenn Pings'n is

denn slacht us Vadder den Buck

denn danzt miin Mudder, denn danzt miin Mudder,

denn flüch de roe Rock!"

 

Heinz Tödtmann